Lumu luimpe lua lupandu - Dipikudibua ku bupika bua Bubi
Padi muntu ulua kudi Kilisto, utonda mibi yende ne udifila ku mudimu wa Mukelenge Yesu ku mutshi mutshiamakane bua bualu buandi, udi muujibue ntente ne disanka. Udi ukumbaja ne "ditalala ne Nzambi" (Lom. 5. 1), udi musue kuleja kudi buonso tshidiye mupete kudi Kilisto, ne tshidi diakalengele diandi. Apu musangu umue, kudi kulua bualu bukuabu budi kabuyi buya bimpe, menji mabi, meyi mabi, anyi udi wenza kabidi bualu bukuabu butambe
bubi: tshidi tshipita ntshinyi? Tudi tudikonka mushindu kayi undi mufikile bua kuenza bualu ebu kabidi bubi? Ngakamana kutonda mibi yanyi ne kuitabuja Kilisto bu Musungidi wanyi. Ndi mumunange, kadi ndi mbaga kuenza malu bu kumpala...ne tangila mpata idi ilua kundi: ndi musungidibue anyi? Ndimukudimune mutshima bimpe anyi? Mbuatshinyi ndi ngeza kabidi malu mabi?
Mushindu kayi undi ne bua kuikala "mupikudibue", buena kuamba ne kuikala musuludibue ku bukole bua bubi ne ku bukokeshi buabu. Nkonko idi ilonda idi ne bua kuambuluisha bua kupeta mandamuna ku nkonko eyi kupitshila ku shap. 5-8 bia Mukanda wa bena Lomo.
6.1 Dishilangana kayi pankatshi pa mibi ne bubi?
Ndishilanga dimue didi pankatshi pa mutshi ne mamuma. Mibi mmalu mabi adi muntu wenza, bu mudi mamuma adi mutshi ukuama. Bubi, mmutshi nkayau, muji udi upatula mamuma mabi. Ke buatshinyi ngikadilu wa muntu udi utamba kuikala mubi ku mesu kua bantu; kabiena bikengela anu kujikija bualu bua mibi, mu diyijimija, anyi mu diyibuikila, kadi kabidi bidi bikengela kutangila bualu bua muji wa malu mabi, buena kuamba ne bubi anyi (mubidi
wa bubi).
6.2 Tshipeta tshia Nzambi ku bualu bua mibi ne ku bualu bua bubi ntshinyi?
Bua mibi anyi malu mabi atudi tuenza, adi mabuikidibue.Paudi witabuja Kilisto, udi mubingishibue ku malu mabi ebe. Kadi bua bubi(mubidi wa bubi)kawena mua kubuikidibua nansha kulongolodibua nansha. Udi ne bualu anu bua kulumbulushibua. Kutangila ke bualu buakakumbaja Nzambi ku mutshi mutshiamakane (Lom. 8. 3). Malu mabi adi mua kubuikidibua, kadi bua mubidi wa bubi: udi ne kulumbulushibua.
6.3 Muena kuitabuja udi anu muinshi mua bukokeshi anyi bupika bua bubi anyi?
Nansha kakese. Bidi mua kumuluila bua enze bualu bubi (1 Yone 2. 1), kadi muena kuitabuja kena mu ngikadilu wa kuenzenza bibi nansha.
Kena ne kipatshila ka kuenza bualu bubi, kena mua kubuepuka pende nansha. Bua kumona mushindu udi muntu upikudibua ku bukokeshi anyi ku bupika bua bubi, tutangile nkonko idi ilonda ei.
6.4 Meku kayi abidi adi mu Lomo 5?
Ku kuledibua, muntu yonso udi kankanuina ka Adama. Badi bitabuja Kilisto ne bakudimuna mitshima yabu badi balua bena diku dia Kilisto. Kufua kuetu ne Kilistoke kudi kutusulula ku dituangajibua dietu ne Adama. Tudi bana ba diku dimue kubanga pa diba adi, diku didi Kilisto muikale Mutu, anyi Nfumu.
6.5 Tshipeta tshia kuikala kankanuina ka Adama tshidi tshinyi?
Kankanuina kuonso ka Adama kadi ne bua kupiana tshintu kampanda: bubi, budi lufu luikale difutu diabu. Too ne katataka, lufu ludi muaba onso, ludi luleja ne bubi buakakuata ndelanganyi yonso ya Adama. Bubi abu budi bukuama mamuma mabi, adi mibi.
6.6 Ngikadilu wa bena diku dia Kilisto udi tshinyi?
Ngasa wa Nzambi wakavulanga, ne wakatamba kuvulangana kudi babungi, ne tshipeta tshiende tshimpe mbuakane, dibingishibua (Lom. 5. 15-19). Mushindu mukuabu wa kuamba udi ne, muena diku dionso dia Kilisto udi muvujibue muakane.
6.7 Bidi biunvuija ne pandi muena diku dia Kilisto, ndi mua kutungunuka mu kuenzenza kua malu mabi?
Nansha kakese. Ngasa kena unvuija dilengulula dia bubi nanssha (tangila bualu ebu mu lukonko ludi lulonda).
6.8 Bua tshinyi kakuena dilengulula ku bubi bua muena kuitabuja?
Bualu bua tudi bafue ku bualu bua bubi, bafue ne Kilisto. Kilisto wakafua pa mutshi mutshiamakane, ka momu anyi? Kutangila tudi bantu ba mu diku dia Kilisto, tuakabatijibua mu dina dia Kilisto, mu dibatijibua "bua Kilisto"; tudi "babumbakajibue" n'andi , tudi nandi. Nunku Kilisto wakafua, tuakafua bietu, ku bidi bitangila muntu mukulukulu wetu, "ngikadilu wa mu Adama".
6.9 Tshidi tshienzeka ntshinyi, pandi nfikila bua kuenza bibi? Ntshiena mufue ne Kilsto anyi?
Diyi dia Nzambi didi dituambila mu Lomo shap. 5-8 ne tuakadi ne muntu mukulukulu (mubidi wa bubi) , ne yeye eu wakashipibua ku mutshi mutshiamakane ne Kilisto. Kadi muena kuitabuja udi, uyila misangu yonso ku malu makole adiye upitshila ne, utshiena anu ne ngikadilu mukulukulu eu (mubidi wa bubi) munda muandi (muaku eu "mubidi" kawena apa unvuija mubidi wetu utudi tulenga nansha, kadi mubidi wa bubi). Ke bua tshinyi udi mua kuenza bibi kabidi. Bua bujadiki buimpe ku bualu ebu, utangile nkonko pa Lomo 7.
6.10 Tudi tunvua tshinyi ku tshiambilu etshi ne "Muoyo wetu mukulukulu wakashipibua n'andi ku mutshi mutshiamakane"?
"Muoyo mukulukulu" wanyi, ngikadilu wakale ungakadi nende kumpala kua kukudimuna mutshima bu muana ne kankanuina ka Adama (Lom. 5. 12). Kumpala kua dikudimuna mutshima dianyi, nakadi muntu mubi kumpala kua Nzambi ne mukumbanyine dipila. Kupitshila ku dibumbakajibua dianyi ne Kilisto mu lufu luandi, Nzambi udi wakula ne ujadika ne, muoyo eu mukulukulu wakafua biau. Kena ummona kabidi mushindu ungakadi kumpala kua
dikudimuna dianyi dia mutshima nansha; bu muntu wa mubidi ne mubi.
Udi mua kunvua bualu ebu anyi? Nansha. Kadi budi bualu bulelela mu mitshima yetu - bualu bua Nzambi udi wamba nunku.
Ke ngelelu wetu wa menji udi ubadibua, kadi anu menji a Nzambi adi ne bualu. Katubuejakaji muoyo wetu mukulukulu wakashipibua ku mutshi mutshiamakane, ne mubidi wa bubi udi ushala munda muetu (tangila Lom. 7. 17, 18, 25; 8. 4; 1 Kol. 3. 2, 3).
6.11 Mubidi wa bubi udi unvuija tshinyi?
Tudi tusangana tshiambilu etshi mu Lomo 6. 6b: "…bua mubidi wetu wa bubi kujimijibua; bua tuetu katuikadi mu bupika bua bubi kabidi". Tshiambilu etshi "mubidi wa bubi" tshidi tshiunvuijansangilu wa bionso bidi bileja bubi. Buenzeji buonso bua bubi munda mua muntu.
Muena kuitabuja udi mua kuenza kabidi bubi anyi (kakadi mua kuenza nunku nansha), kadi bubi kabuena bumulombola nansha.
6.12 Bualu bua mibi yetu buakajikijibua ku lufu lua Kilisto luakafuaye bualu buetu; kadi mushindu kayi udi mujikijibue bualu bua bubi ne bukole bualu?
Kabuena bujikijibue ku lufu lua Kilisto bua bualu buetu nansha, kadi ku luetu lufu ne Kilisto.
Tufuanyikije ne malanda akadi pankatshi pa mupika ne nfumue' ende mu tshikondo tshiakadi mupostolo ufunda mukanda. Nfumu wakadi ne bukokeshi buonso pa mupika wandi, kadi anu patshivuaye ne muoyo. Kadi pakadi mupika ufua, nfumu kavua kabidi ne bualu bua kukokesha kudiye nansha. Bidi mushindu umue n'etu lelu. Patudi bafue ne Kilisto, bubi buakadi butukokesha bu nfumuetu wa kale, kabuena kabidi ne bukole ne bukokeshi kutudi nansha. Etshi ke kupikudibua.
6.13 Dibatiza didi diunvuija tshinyi?
Dibatijiza didi tshinfuanyi tshia kubumbakajibua ne Kilisto mu lufu luandi. Bu muakafua Kilisto ne kujikibua mene, mushindu eu utuakabatijibua (Lom. 6. 2, 3). Dibatiza didi diunvuija malu makuabu kabidi, tshilejelu tshia padi muntu ubatijibua udi ulua muyidi (Yone 4. 1, 2 ne 1 Kol. 10. 2), ... kadi tshiena bualu mu Lomo 6 tshidi ne, tuetu tudi babumbakajibue ne Kilisto mu lufu luandi, buena kuamba ne tudi bafue nandi.
Tumanye ne kuikala mubatijibue kakuena kutupesha bukokeshi kampanda nansha bumue bua kuya mu diulu nansha.
6.14 Udi umanya mushindu kayi ne udi mufue ne Kilisto? Ndi mua kubiunvua anyi?
To. Kuena mua kubiunvua nansha. Paudi witabuja Kilisto ku ditabuja, ke tshikondo tshidi bualu abu bukumbana ne udi ubuitabuja bualu bua diyi dia Nzambi didi diamba nunku.
6.15 Bingikala ndi mufue ne Kilisto, mushindu kayi udi lufu elu luambuluisha ku malanda anyi ne bubi?
Mubidi wa bubi (ngikadilu eu wa budi udi mutapuluke ne disua dia Nzambi) kawena kabidi ne bukokeshi kuudi nansha.
Budi bualu bu bua muntu udi mufute makuta a bungi bua yeye kayi mu nvita, kadi mukuabo aye pa muaba wandi. Ditunga didi dimufundila ne "bidi bikengela bua uye mu nvita mpidieu padi mukupinganyi webe mufue", udi ufunda bua kuandamuna ne "Ntshiena nkumbana, bua kuya mu nvita bualu bua, ndi mufue". Udi ujadika ne udi ne bualu bua kudibala ne udi mufue, bualu bua, mumupinganyi wa muaba wende mu nvita udi mufue.
6.16 Bingikala ndi mufue ne Kilisto mushindu kayi udi lufu elu lukuatshisha nsombelu wanyi wa matuku onso?
Padi bubi busua kuenza bukole kampanda kutudi, tudi ne dikima (ne balombibue) bua kudibala ne tudi bafue (tangila lukonko ludi lushale); ku ditabuja, tudi tunvua ne, musangu nansha umue, katuena mua kukokela bubi.
6.17 Muena kuitabuja udi ne bua kulama mikenji (anyi binga bilele) bua kujadikeye ne kena mua kuenza bibi anyi?
To. Kulama mikenji anyi binga bilele, ke njila wa kulonda nansha. Tshidi anu ngikadilu wa mubidi (bualu bua udi weyemena ku bukole bua mubidi). Wewe mutete mushindu eu wa kukumbaja mikenji anyi bilele bikuabu, neumone ne (pawikala ne bulelela), kuena mua kukumbaja nansha. Paulo udi unvuija ne, tudi bafue ku mikenji (bu mutudi bafue ku bubi), Lomo 7. 1-6.
Bualu bukuabu, mikenji ya Mose, yakapeshibua anu tshisamba tshimue tshia Isalele.
Kadi ku bualu bua luendu lua muena kuitabu ne mikenji idi ne bua kumulombola, tangila L. 6. 28.
6.18 Mushindu kayi udi muena kuitabuja mua kuenda mu mushindu udi usankisha Nzambi?
Ke ku dilama dia mikenji nansha, kadi mu kueyemena Kilisto. Tuetu balekele Nyuma Muimpe utulombola kudi Kilisto, diba adi Nyuma Muimpe au neatupeshe kabidi bukole bua kuenda mu mushindu udi usankisha Nzambi (tangila Nkonko L. 6. 27 ne ku L. 6. 31).
6.19a Nganyi udi "n (di)" mu Lomo 7? Paulo anyi?
To. Kena mua kuikala Paulo to. Kena mua kuikala Paulo, bualu udi wamba ne "tshikondo tshikuabu…tshiyi ne mikenji…" (Lom. 7. 9). Meyi a mushindu eu kaena mua kuakudibua bua Paulo wakadi muledibue mufalese nansha (Filip. 3. 5).
6.19b Nganyi udi "n (di)" mu Lomo 7? Mmuntu udi kayi muena kuitabuja anyi?
To, ebi kabiena bilelela nansha. Muntu wa mu Lomo 7, ukadi ne ngikadilu mupiamupia, bualu bua udi wamba ne udi musue kuenza muanda muimpe (Lom. 7. 19); ne " ndi nsanka munda muanyi bua mikenji ya Nzambi" (Lom. 7. 22). Ndijinga patoke dia ngikadilu mupiamupia udi Nzambi upesha muntu ku kuledibua kua tshiakabidi (Yone 3. 3).
6.19c Nganyi udi "n (di)" mu Lomo 7? Mmuena kuitabuja mulelela anyi?
Muena kuitabuja mulelela, eyo, kadi muena kuitabuja mukumbane, mu ngikadilu mukumbane anyi? To kena mua kuikala muena kuitabuja mu ngikadilu mukumbane nansha. Meyi aa ne "meme ndi ne mutshima wa kuenza malu mabi a mubidi, ndi mupanyibue kudi bubi" (Lom. 7. 14) kaena mua kukumbanyina muena kuitabuja udi mu ngikadilu mukumbane nansha.
6.19d Nganyi udi "n (di)" mu Lomo 7? Kadi apu nganyi?
Udi muntu udi muledibue tshiakabidi (tangila L. 2. 20) Kena wenda muntu wa nyuma nansha kadi muntu wa mubidi (fuanyikija ne 1 Kol. 3. 1) weyemena mu bukole bua mubidi wende) , upangila misangu yonso idiye udieyemena nunku; muikale muena dikenga dikole. Kena mumanye ne mubidi nansha mulengele ku mesu mu ngikadilu wa "butendeledi"; nansha wa buakane, udi ushala anu mubidi.
Kena ngikadilu udi ukumbana bua muena kuitabuja nansha, kadi babungi badi bapitshila mu ngikadilu eu mu tshikondo kampanda tshia muoyo wabu pabuloba too ne padibu bayila bua kuitabuja ne, ke anu Kilisto, kadi kabidi mu mudimu wende mukumbane bua bualu buabu; buena kuamba ne too ne pamanyabu dipikudibua diabu mu lufu lua Kilisto. Muena kuitabuja udi mua kupanga anyi kukuluka misangu mipite pa umue mu ngikadilu eu matuku a muoyo
wende pa buloba.
6.20 Bualu bua muena kuitabuja wa mushindu eu, budi tshinyi?
Muena kuitabuja eu udi ukulukakuluka misangu yonso mu bualu bukole ebu. Ndifuilakana didi pankatshi pa ngikadilu mupiamupia ne mukulukulu biende (anyi mubi). Udi ujinga bua kuenza malu mimpe ne kena uenza. Kadi malu mabi adiye kayi musue bua kuenza, udi uenza, adi amuenekamueneka misangu yonso (Lomo 7. 19).
6.21 Muena kuitabuja wa mushindu eu udi ujingulula tshinyi?
Malu oo makese asatu. Tshiakumpala ne, udi anu ne mubidi wa bubi buena kuamba ne ngikadilu mubi. Kulonda bualu buibidi ne, bualu buimpe kabuena munda muende "munda muanyi … kamuena muikala bualu buimpe" (nv. 18). Ne kundekelu, kena mua kudisungila nkayende, kadi udi dijinga ne mukuabu bua kumusungila. "Ka meme muena majiya! wansulula ku mubidi wa lufu elu nganyi?" (Lom. 7. 24).
6.22 N(di) wa mu Lomo 7 ufikila ku diunvua ne kena mua kupatuka nkayende mu lunteke, dikuatshisha didi dilua panyi?
Ku ndekelu kua shap. 7, muntu eu, udi uteta kulekela kueyemena ku bukole budi bufuma kudiye nkayende, udi ubanga kukeba dikuatshisha didi difuma kukuabu. Kabiena kabidi kudikonka ne "mushindu kayi undi mua kudipikula meme nkayanyi", kadi ne "wansungila...?" (Lom. 7. 24).
6.23 Nkomenu kayi utudi tufika nende ku ndekelu kua shap. 7?
Nkomenu ibidi. Kumpala muntu wamanyi kuyila ku bionso bidiye muenze ne, kena mua kuenza yeye nkayende bualu bumue buimpe. Kulonda, wajadiki ne kudi anu ngikadilu ibidi, mukulukulu (mubidi) udi kayi mua kushintuluka, udi anu mubi, ne mupiamupia. Idi mitapulukangane. Pananku udi usakidila Nzambi (Lom. 7. 25) bualu bua udi ujadika ne, anu Nzambi nkayende ke udi mua kumupikula, ne bionso biakadiye mua kuenza, mbimane kukumbajibua kudi
Mukelenge wetu Yesu (nbagilu wa nv. 25 wa Lom 7 ne nv 1 wa shap. 8). Diyi dia ndekelu menemene didi disanganyibua mu Lomo 8. 1-11 (tangila nkonko idi ilonda).
6.24 Muena kuitabuja udi mua kupishibua kudi Nzambi anyi?
To, nansha kakese ne bualu bua ukadi "mu Kilisto". Kadi nudi nuvuluka ne Kilisto udi mutumbishibue ku dia balume dia Nzambi. Nunku bikala muntu ukeba bua kupisha muena kuitabuja wa mushindu eu, udi ne bualu bua kuanji kupisha Kilisto. Budi bualu bukole!
6.25 "Mukenji wa Nyuma wa muoyo" ne "mukenji wa bubi ne wa lufu" bidi biunvuija tshinyi?
Muaku "mukenji" udi muakunvuija kabidi "buenzeji". Dibue didi dipona panshi: "mbuezeji (bukole)" kampanda bua bufukibua (loi de pesenteur). "Mukenji" wa Nyuma udi kabidi buenzeji anyi bukole kampanda; buena kuamba ne Nyuma udi utulombola, ne utuambila bua Kilisto. Mukenji wa bubi muomumue, udi kabidi buenzeji anyi bukole kampanda, buena kuamba ne, bubi budi butantamana ku disua dia Nzambi, ne bufikisha muntu ku lufu. Diba
didi muena kuitabuja weyemena Kilisto, witabuja ne mudimu wandi udi mukumbane, ne kakuena kabidi dipila kudi badi mu Kilisto Yesu (buena kuamba ne witabuja ku "lumu luimpe lua lupandu luandi"; Efes. 1. 13), Nyuma Muimpe udi ne budikadidi bua kuenza mudimu ne kumulombola munda muandi.
6.26 Tshipeta tshia Nzambi bua mubidi wa bubi ntshinyi?
Katupu muoyo ne anu malu mabi, bienzedi ke bidi bibuikidibua, kadi bua mubidi wa bubi udi upishibua. Kakuena mushindu mukuabu udi ukumbanangana ku disua dia Nzambi ku bualu bua mubidi wetu wa bubi anu kuupisha. Mikenji kayivua mua kuenza bualu kampada ku mubidi eu wa bubi nansha. Ivua (mikenji) ileja anu mushindu kayi udi muntu muikale mubi, kadi kauyi utuala diambuluisha, bualu bua yakadi (mikenji) "mitekete" kayiyi ne bukole, buena kuamba ne muntu kakadi ne bukole anyi ukumbana bua kuyilama.
6.27 Bionso ebi bidi biunvuija ne muena kuitabuja udi mua kuiba anyi, kushipa, anyi kuenza bionso bidi mikenji anyi?
To. Buakane budi buamba ne mikenji idi mikumbajibue munda mua muena kuitabuja. Kadi kipatshila kakena ne, udi uteta bua kulama mikenji nansha, kadi udi wenda mu Nyuma muimpe, bidi biunvuija ne udi wenda bilondeshel disua dia Nzambi, ne udi ukina bubi.
6.28 Mudimu eu udi ukumbana mushindu kayi mu nsombelu? Kuenda mu Nyuma ntshinyi?
Nyuma udi ukokesha muena kuitabuja kudi Kilisto (Yone 14. 26 ne 16. 13, 14), ne ebi bidi bimuuja ntente ne disanka nedijinga dia kufuana Kilisto. Patudi tuidikija Kilisto, disua dia mikenji didi didikumbanyina.
Tuangate tshilejelu. Mikenji idi yamba: "Kuibi". Muena kuitabuja kena muinshi mua mikenji, kadi Nyuma udi ukokesha muena kuitabuja kudi Kilisto. Kilisto wakadi mubanji, ne wakalua mupele bua tuetu tuvuijibue babanji. Wakamba ne, kupa kudi kutamba kuangata kusankisha muntu. Mushindu kayi udi muena kuitabuja uyila bua kusankisha Kilisto ne kumuidikija, udi ujinga bua bakuabu bamupe yeye, anyi bua yeye kuambuluisha bakuabu. Mushindu kayi udiye ne bua kuiba (Efes. 4. 28).
Bidi bilelela, eu ke ngikadilu udi ukumbanyina muntu udi munange Mukelenge, kabiena ku disua nansha kadi ku buenzeji bua bukeshi bua Mukelenge, buenzeji bua dikumbana ne bua dinanga; ke bualu kayi mupostolo Yone udi wamba ne kunanga Nzambi ne kunanga bana ba Nzambi, nkulama kua mikenji. Padiku kunanga kua muntu, dijinga tshinana diamba kudi muntu udi munagibue, didi dilua mukenji kudi udi unanga.
6.29 Muena kuitabuja udi wenda misagu yonso anu mu Nyuma anyi?
Biakadi mua kuikala nunku, kadi kabiena bimueneka mu bikondo bionso to. (tudi bamanye buonso mushindu eu mu luendu luetu). Muena kuitabuja muakane wakadi mua kuikala misangu yonso mulombodibue kudi Nyuma Muimpe; kadi udi mua kulua bua "kubungamija" Nyuma Muimpe (Efes. 4. 30). Bidi bilua diba didi muena kuitabuja muenze bualu bubi, kayi mukokeshibue kudi Kilisto, anyi kayi wenda bu udi kumpala kua Kilisto ne ditshina diandi ne mu buobumue nandi.
6.30 Tudi mua kuikala batuishibue ne tudi tuenda mu Nyuma mushindu kayi?
Anu mu ditapuluka ne malu onso adi anyingalaja Nyuma Muimpe. Paudi ne menji mabi, udi ne bualu bua kuatonda kudi Mukelenge. Wewe muambe diyi dibi, bikengela kabidi uditonde. Kuindidi nansha, lama buobumue ne Nzambi. Mu dienza dia mushindu eu, Nyuma udi ne budikadidi bua kukuata mudimu kabidi bua kutukokesha kudi Kilisto ne kutulombola (Lomo. 8. 14). Mushindu eu ke udibu "bashipa malu a mubidi ne nkuka yau" (Lom. 8. 13) ne benza mu Nyuma.
6.31 Mushindu kayi udi Nzambi utukuatshisha bua kuenda mu Nyuma?
Nzambi wakatuma Nyuma wende bua kuikala munda muetu (Lom. 8.10, 11). Nyuma Muimpe udi katataka munda mua muena kuitabuja (tangila 1 Kol. 6. 19), udi utukokesha kudi Kilisto (Yone 16. 14), ne utumanyisha ne, Nzambi udi Tatu wetu (Lom. 8. 15, 16). Ke lupadu lukumbane. Babingishibue ku bualu bua malu mabi, bapikudibue ku bupika bua bubi, ne bamanye kupitshila ku Nyuma Muimpe ne Nzambi bu Tatu wetu udi mutunange.
6.32 Bikala lupandu luetu ludi lumane kukumbana mushindu eu, buatshinyi bena kilisto ba bungi badi bakenga mu mubidi wabu ne bafua? Mubidi kawena biawu musangisha mu lupandu elu anyi?
Bena kuitabuja badi bakenga bualu bua batshiena bamue ba mu bufukibua ebu. Paulo udi unvuija mu mufundu wa mu Lomo 8. 18 ne ku 29. Bua muntu, bubi buakabuela pa buloba, ne bu tshipeta, bifukibua bionso bidi bitua mikemu. Kadi bualu ebu nebujikijibue. Tudi tuindila "dipikudibua dia mubidi" (Lom. 8. 23). Palua Kilisto, netuangate mubidi mupiamupia. Patutshiena tuindila, tudi ne "ditekemena" edi ne Nyuma udi utusamba mu mateketa/ dipangila
dietu.
6.33 Nzambi wakadianjila kusungula bakuabu bua ku dibutuka anyi?
To. Nansha kakese. Mukanda wa Nzambi kawena ulongesha nunku nansha. Kutangila, Nzambi udi musue bantu buonso basungidibue (Tito 2. 11; 1 Tim. 2. 4). Ne kabidi "Nzambi udi wela mukenji ne bantu buonso; badi kuonso bakudimune mitshima yabu" (Bien. 17. 30). Mu Lomo 9. 18, badi bakula ne, Nzambi udi ukolesha badiye musue (kadi anu kunyima kua muntu mumane kukolesha nkayende mutshima wende, bu mudi tshilejelu tshia Palo tshituleja (Lomo 9. 14-17). Lomo 9. 22, 23 udi ujadika patoke ne Nzambi yeye wakalongolola bivuadi bileja luse bua butumbi, kadi wakatukija ne lutulu lunene bivuadi bitekela tshiji tshiandi bilongolodibua bua dibutuka (kabena bakula
ne Nzambi ke udi mu bilongolola nansha.
MUKENJI MUIMPE WA LUMU LUIMPE LUA LUPANDU LUDI LUAMBIBUA KUDI BUONSO.
Tshikoso
Kudi malu manene asatu adi alenga bukua bantu:
- Mibi (= malu mabi)
- Bupika bua bubi (muji kampanda wa bubi ne malu mabi onso)
- Ntatu ne makenga a mubidi.
Bualu bua kumpala budi bujika ku lufu lua Kilisto bua bualu buetu (Lom. Shap. 3-5).
Buibidi budi bujika ku lufu luetu ne Kilisto (Lom. 6).
Buandekelu buisatu nebukumbane palua Kilisto bua kutungata (Lom. 8).
Kadi mu malu onso, tudi ne bua kutekemena kudi Kilisto.
