Mukelenge Yesu : makenga ne lufu biandi
2.1 Yesu Kilisto wakafua bu muntu mufuile ditaba anyi?
Eyowa- Kadi lufu luende ludi ne diunvuija diabungi dipite muntu udi ufuila ditaba (anyi bumanyishi). Muaku "Martyr" udi unvuija Mumanyishi" ne udi muakudibue nangananga bua muntu udi ufua bua bumanyishi buandi. Diunvuija dionso edi didi dilelela kabidi bua Kilisto. "Wakadi mumanyishi wa bushuwa" (Buak. 3. 14) ne "wakadi mutumikidi too ne ku lufu, lufu lua ku mutshi mutshiamakane" (Filip 2. 8). Kadi nkonko idi ilonda ne mandamuna ayu, bidi bileja
bilondeshele Mukanda wa Nzambi ne, kumpala kua bionso lufu lua Muekelenge Yesu ludi ne mushinga wa pabuawu; ne kabidi, luakadi ne mushinga wa bungi kupita lufu lua muntu udi ufuila ditaba.
2.2 Kilisto wakashipibua anyi wakateka muoyo wende panshi?
Kilisto akangata malu onso aa abidi. Wakashipibua, luseke lukuabu wakateka muoyo wende (buena kuamba ne nkayende wakitaba kufua). Bantu bakenza muabu muonso bua kumushipa; bakamushipa ku mutshi mutshiamakane, ne mu mushindu eu bakabadibua bu bakamushipa (Bien. 2. 23). Elu ludi luseke lua bujitu bua muntu ku bualu bua lufu luandi.
Kadi kutangila ku lunga luseke, Kilisto wakaditekela muoyo panshi (Yone 10. 11, 15, 17, 18). Tudi tubala kabidi ne : " pakangataye nvinega, wakamba ne, bualu buakujika; wakinyika mutu, wakapola muoyo " (Yone 19. 30). Elu nduseke lua bukole bua buNzambi buandi.
2.3 Buatshinyi Yesu wakafua?
Tshiena bualu etshi tshidi tshimpe tshitambe, ne tshidi bualu bukole bua kufila diandamuna dia tshikoso. Kilisto wakafua bua kufila bumanyishi bua ditumikila diandi dinene kumpala kua Nzambi,
- bua kutumbisha Nzambi ku bualu bua bubi,
- bua kutumbisha Tatu mu ditumanyisha dinanga diandi,
- buakupesha Nzambi bishimikidi bia kubingisha babi,
- bua kutuadila bantu bakamana kujimina kumpala kua Nzambi lupandu ne diakalengele.
2.4 Yesu wakatuala mibi yanyi anyi?
Bidi bilondeshela paudi mumuitabuje, pawikala mumane kulua kudiye ne mibi yebe, ne mumane kukudimuna mutshima webe, wakamuitabuja bu Musungidi webe, diandamuna didi ne "eyo". Patudi tubala ne Yesu wakambula malu mabi "etu", buena kuamba ne malu mabi a bena kuitabuja (1 Pt. 2.24). Mukanda wa Nzambi kawena wamba neyesu wakambula malu mabi a "buonso" nansha, kadi udi wamba ne wakambula malu mabi a "babungi" (anyi bangi
Yeshaya 53. 12).
2.5 Lufu lua Kilisto ludi lukumbana bua bantu buonso bafuidibue luse anyi?
Eyo. Lufu lua Kilisto ludi lukumbana bua bantu buonso balue kudiye. Kadi anu aba badi balua kudiye kebadi bapeta ku lufu elu tshipeta tshia kulekedi kua malu mabi abo. Dipa didiku. Didi didifila kudi muntu yonso.
- Nzambi Musungidi wetu "udi musue bua bantu buonso basungidibue ..." (1Tim. 2.4).
- Bikala muntu ne Nyota alue kundi anue biandi (Yone 7. 37).
- "Ne udi ne nyota alue; udi musue angate biandi patupu mayi a muoyo (Buak. 22. 17).
2.6 Buonso nebafuidibue luse anyi?
Muntu yonso udi mua kubuikidibua (tangila tunungu tudi tulonda). Kadike buonso kabakufuidibua luse nansha. Tudi tubala ne:
- "bua mutu yonso udi umuitabuja, kafu biandi, kadi ikalene muoyo wa tshiendelele" (Yone 3. 16)
- "Udi witabuja muana udi ne muoyo wa tshiendelele, kadi udi upidia muana (buena kuamba ne udi kayi witabuja) kena wikala ne muoyo, kadi tshiji tshia Nzambi tshidi tshishala kudiye (Yone 3. 36)
2.7 Kubuikidibua ntshinyi?
Muaku kubuikidibua (badi bamba mushindu mukuabu ne "kujimijibua mibi) udi mu 1 Yone 2. 2 "ne yeye udi bu mulambu wa kubuikidibua nawu mibi yetu; ke ngua mibi yetu nkayayi, kadi wa mibi ya buonso ba pa buloba bujima". Mu mushindu kayi udi dibuikidibua edi dikale bua "buonso ba pa buloba bujima"? Bualu bua mulambu wende udi mutambe bunene, ne udi ne mushinga munene kumpala kua Nzambi, udiye mua kupesha bantu buonso
lupandu pa bualu buawu - nansha bu mudi buonso kabayi bitaja (tangila kanungu kadi kalonda.
Tuvuluke ne Nzambi udi wa tshijila ne muakane. Bua bualu ebu, muntu mubi udi ukumbanyina tshilumbuluidi ne dipishibua kudi Nzambi. Kakuyi bua mudimu wa Kilisto ku mutshi mutshiamakane, nganyi wakadi mua kupanduka ku tshilumbuluidi tshia mushindu eu. Kadi bua bualu bua ngasa wa Nzambi, Kilisto wakafua, ne wakalua mulambu wa dibuikidibua dia mibi, nunka katataka, Nzambi udi ne budikadidi, bua kupa lupandu lua patupu. Mu mushindu eu,
"wakadifila bua bualu buetu". (1 Tim. 2. 6).
Mufundu mukuabu mufuanangane udi usanganyibua mu Lomo 3. 25 udi wamba ne Nzami wakafila muanende bu mulambu wa kubuikila nau mibi ku ditabuja dia mu mashi andi. Muaku eu udi utuvuluija mufuanu mukuabu wa mu dipungila dikulukulu wakadi tshibuikilu(propitiatoire) tshia mushete wa tshipungidi thiedibua masshi musangu umue ku tshidimu (Lew. 16. 14). Mashi akadi amiaminyibua pa tshibuikilu tshia mushete wa tshipundi mu ntenta wa kusambakena, adi unvuija ne Nzambi wakasankishibua ku lufu lua Kilisto ne tshibueledi tshia kuya kumpala kua Nzambi ntshiunzuluke (bualu bua pa tshibuikilu etshi ke muaba wakadi Nzambi usambakena ne muntu bua kuakula nende).
Mu tshikoso, dibuikidila dia mibi, didi dipesha Nzambi bishimikidi bia kupesha bantu buonso lupandu patupu. Lupadu elu ludi lukumbana anu kudi badi baluakidila anyi baluitabuja.
2.8 Diangatshila muaba ntshinyi?
Muangatshidi wa muntu muaba, udi muntu udi wangata muaba wa mukuabu. Pa mutshi mutshiamakane, Kilisto wakangata muaba wa badi bamuitabuje. Muntu muakane wakafuila bua bantu babi (1 Pet. 3. 18). Yeye wakatutuadila mibi "yetu" ne "tuakondapibua ku mibunda bunda yandi" (Yesh. 53. 12; 1Pt 2. 24). Meyi mamanyike bimpe a muprofete Yeshaya, adi unvuija bimpe tshidi dianagatshila muntu muaba diunvuija. "Bakamutapa mputa bua mibi yetu,
bakamukuma bua malu mabi etu; dikenga didi divuija ditalala dietu, diakadi pambidi pandi, ne tuakukoleshibua ku mibundabunda yandi... ne Yepowa wakuteka dipila dia bubi bua buonso buetu pambidi pandi" (Yesh. 53. 5, 6). Mu mushindu eu, "Kilisto wakateka "muoyo wende bua kupikula nau, bantu bangi [anyi babungi]" (Mt. 20. 28; Mk. 10.45).
Diangatshila muntu muaba didi anu bua badi bitabuje.
2.9 Tudi tuyila tshinyi bua dituku dinene dia kubuidibua mibi (Lew. 16)?
Tshimue tshia ku bilele biakadi bifundila bena Isalele, tshiakadi tshibikidibue ne "Dituku dinene dia kubuikidibua mibi" (Lew. 16) Milamu yonso mifidibue dituku adi, idi tshilejelu tshia nseke ibidi idi nayi mudimu munene wa Kilisto. Dibuidibua (tangila mu L. 2.7) Diangatshila muntu muaba (tangila L. lua 2.8).
Musangu umue ku tshidimu, bena Isalele bakadi ne kuenza disanka edi dia dituku dinene dia kubuikidibua mibi. Mulambu wa mpumbu ya mbuji ibidi yakadi tshimue tshia ku bitupa bia mushinga bia dituku edi. Mpumbu umue wakadi wa "Yepowa" ("kuibuikidibua") ne mukuabu bua bena Isalele ("kuangatshila muntu muaba") Mashi a mpumbu wa kumudilu, akadi amiaminyibua pa tshibuikilu tshia mushete ("kubuikidila") bua muibidi, muakuidi munene wakadi
utonda bubi buonso bua bena Isalele mutenteke bianza biandi pa mutu wa mbuji, kunyima mbuji eu wakadi utumibua mu tshipela (Lew. 16).
Kilisto wakakumbaja malu onso aa abidi : Nzambi udi musankishibue ne mutumbishbue ku mudimu wandi (kubuikidibua) ne mibi "yetu" yakatuadibua kudiye "kutuangatshila muaba"
2.10 Dibuikidi dia mibi didi dikumbanyina tshilumbuluidi kumpala kua Nzambia anyi?
Eyo, menemene. Bakuabu bakalongesha ne "kubuikidila kua mibi "kudi kusua kuamba anu ne, Kilisto wakabuela anu mu ngikadilu wa dikenga tshianana wakangata anu mubidi mubi wa bumuntu". Kuamba nunku nkupua muoyo ne "dikenga didi divuija ditalala dietu, diakadi pambidi pandi (Yesh. 53. 5), ne kabidi "Muele wa nvita wa Yepowa wakadi lukuna ne nya'nyi (mulunda ) wa mu mudimu) (Zek. 13. 7). Kilisto wakatuala malu mabi etu, mbuena kuamba ne,
wakambula tshilumbuluidi tshiakadi tshitukumbanyine bualu bua mibi yetu.
2.11 Mudimu wa Kilisto, udi kabidi ne bupikudi bua ntatu ya ku mubidi eu anyi (masama; nzala lufu…)?
To, nansha kakese bua patutshiena pa buloba ebu. Babungi bakunvua bibi nv. 5 wa muprofete Yeshaya 53 "tuakakoleshibua ku mibundabunda yandi" Nvesa eu udi wakula bua "malu mabi etu" ne bua "ditalala dietu" mu mushindu eu ne "kukoleshibua" kudi ku bualu bua bubi, disama edi dinene ke ku bualu bua ntatu ya mubidi eu nansha.
Bia mumua nv 4 wa shap. umue eu, wakunvuibua kabidi bibi "Bulelela, wakatutuadila makenga etu, wakutuambuila kanyinganyinga ketu". Nvesa eu kena wakula bua mudimu wa Mukelenge ku mutshi mutshiamakane nansha, kadi bua diondapa dishilangane diakenza Mukelenge bu mudi diabulula dia nvesa eu mu Matayo 8. 17 dileja.
Bua katataka, tutshiena tuindila dipikudibua dia mubidi eu (Lom. 8. 23).
2.12 Kupikudibua (rachat) ntshinyi?
Dipikudibua (tudi mua kuamba kabidi ne "bupikudi" [rachat]) didi mu mushinga udi ufutshibua. Bilondeshele mikenji ya Mose, bumpianyi buakadi ne bua "kupikudibua" (Lew. 25. 25). Tshilejelu, bikala muntu wakadivuija mupele, bua bualu kampanda, ne wakajimija bumpianyi buandi, Muntu wa mu diku diende wakadi ne bualu bua kubupikula anyi kumupikula yeye (bikalaye wakavuijibua mupika).Tudi ne tshilejelu tshimpe mu mukanda wa Luta, muvua Naomi mujimije bintu biandi bionso, tudi tumona Boaza, udi ulua mupikudi anyi (musungidi).
Kilisto wakapikula (anu) badi bandi bakamuitabuja. Ne mushinga mene wakafutaye, mmashi andi mene (1 Pet. 1. 18) buena kuamba ne muoyo wende.
2.13 Kupikudibua (achat) kudi kunvuija tshinyi?
Bulelela, kupikudibua (achat), kudi kulomba kabidi kufuta kua mushinga, kadi kudi dishilangana pankatshi pa kupikula (achat) ne kupikula (rachat).
Kupikula (achat) kudi bualu bua buloba bujima, ke anu bua bena kuitabuja nansha. Nvesa eu udi ulonda udi ujadika bualu ebu :"Kadi baprofete ba mashimi bakabika munkatshi mua bantu kabidi, bu mudi bayishi ba mashimi balua kubika munkatshi muenu, nebalue mu musokoko, ne malu manutapulule ku dibutuka, bavila Mukelenge wakabapikula (achat) badivuijila dibutuka dia lukasa. (2 Pt. 2. 1) Bayishi aba ba mashimi bakapikudibua (achat), kadi bidi
buinvuika patoke ne kabakapikudibua (rachat) (kabakadi bitabuja Mukelenge) bualu bua bakadi bavila Mukelenge ne badivuijila dibutuka dia lukasa.
Tshilejelu tshimpe tshidi mu lusumuinu lua Dibue dia mushinga mukole mu budimi. Budimi buonso bujima buakasumbibua bua (bualu bua dibue dia mushinga mukole) ne Budimi budi tshinfuanyikiji tshia buloba, Mt. 13. 37, 44). Lufu lua Kilisto ludi lumupesha bukelenge ne bukokeshi pa buloba bujima - bionso biakasumbibua kudiye.(Bukokeshi ebu budi bua bukumbaja buende budiye nabu pa buloba bujima bu Mufuki). Katubuejakaji muaku wa pa muanda kupikula udi wakula bua achat ne dipikula udi wakula bua rachat.
2.14 Mukelenge wakambula malu mabi etu tshikondo kayi?
Bua kuamba patoke: kena muambule pakadiye ne muoyo pa buloba, anyi padiye mufue mu lukita, anyi tshikondo tshia meba asatu a kumudilu a pa mutshi mutshiamakane nansha. Kilisto wakambula malu mabi etu mu meba asatu a midima "kubangila ku diba isambombo… ne ku diba tshitema" (Mt. 27. 45). Pa diba adi; midima yakadiku - ne dipudikila. Katuena tunvua muaku nansha umue wa mukelenge too ne pa diba tshitema. Kundekelu, muntu nansha
umue kena mua kupima bule ne bungi bua malu akakumbana mu meba aa kudiye nansha; kadi diyi dikole dia Mukelenge ku ndekelu, kua meba aa, didi (mu tshiakuidi tshikuabu) dibulula tshilulu : Nzambi wanyi, Nzambi wanyi wakundekela bua tshinyi? (Mt. 27. 46).
Kilisto udi muntu umuepele Muakane wakalekedibua kudi Nzambi, ne anu mu meba aa asatu a midima ke muakenzeka mudimu wa dibuikidibua dia malu mabi etu. Kumpala kua meba aa, Kilisto anu mu buobumue bupuangane ne bujima ne Nzambi, ne kunyima udi wela diyi kudi Tatu ne uteka muoyo wende mu bianza biende (Lk. 23. 34, 46). 1 Pt. 2. 24 udi uleja ne, "mpa mutshi mutshiamakane", pakambula Kilisto malu mabi etu.
2.15 Bua tshinyi Mukelenge Yezu wakalekedibua kudi Nzambi?
Bualu ebu buakadi buya mu ditapuluka ne ne dimanye ne bipeta bionso biakadibu mua kuindila (Mis. 37. 25). Diyi dia Muekeleng : "wakundekela bua tshinyi?" udi usanganyibua mu misambu 22. 1, ne musambe eu udi utungunuka bua kunvuija ne bulelela buonso, badi badifila kudi Yepowa badi "bapikudibue" ne kabena bafuishibua bundu nansha" (Mis. 2. 4, 5). Kadi mmushindu kayi utudi tumona eu muena lulamatu mutambe buonso ulekedibua?
Diandamuna dia kumpala didi ne "wewe udi wa tshijila" (Mis. 22. 3). Pakambula Kilisto malu mabi etu, Nzambi wa tshijila wakadi ne bua kuikala kule nende, wakadi mene ne bua kumulumbuluisha; ne "kumushipa". Diandamuna dibidi didi disanganyibua mu dipungila dipia dipia: Kulisto wakambula malu mabi etu.
2.16 Mukelenge, wakalekedibua kudi Tatuende anyi?
Diyi dia Nzambi kadiena ne mufundu udi ujadika kulekedibua kua Mukelenge kudi Tatu wende nansha. Padidi diakula bualu bua kulekedibua kua Mukelenge, Kudi kutangilangana anu ne "Nzambi": "Nzambi wanyi, Nzambi wanyi, wakundekela bua tshinyi?" (Mt. 27. 46; Mk. 15. 34; Mis. 22. 1). Kadi padi diyi diandi diakula bua malanda a Mukelenge bu Muana wa Tatu, mifundu idi ijadika ne, wakadi (ne udi) bikondo bionso mu tshiadi tshia Tatu wende (Yone 1. 18). Kakuyi kukeba bua kujingulula malua a adi masokoka kutudi ne adi atupitshila, bidi bikengela kumone dishilangana didi pankatshi pa kulekedibua kua Mukelenge Yesu kudi Nzambi; ne malande ende mu bikondo bionso ne Tatu wende.
Tshilejelu tshikese tshidi mua kutukuatshisha: Bikalaku kudi mulumbuluishi, udi ne muanende mufundibue ku tshilumbuluidi ne mupile, nunku muana udi ne bua kulumbulushibua kumpala kua mulumbuluishi (udi tatu ende), tshidi tshipita ntshinyi? Mulumbuluishi bu bulumbuluishi) udi ne bualu bua kuamba dipila dia muanende - kadi (bu tatu) mutshima newikale mulamate kudi muanende.
2.17 Wakalekedibua kudi Nzambi pakafuaye anyi?
To, bualu wakamba ne "bionso biakumbanyi" (Yone 19. 30) ne wakateka muoyo wende mu bianza bia Tatu (Lk. 23. 46). Tangila kabidi L. 2. 14.
2.18 Tudi tumanya munyi ne Nzambi mmuitabuje mushinga wakafuta Kilisto?
Kudi tshimanyishishilu tshidi patoke ne tshidi tshimueneka kutudi, Nzambi wakafila bumanyishi bua Kikisto - yeye uvua bantu bashipe ku mutshi mutshiamakane: wakamubisha ku bafue, wakamuangata
mu muaba mutambe kupuekela, wakamupesha muaba udi mutambe butumbi, muaba wa tshinemu ku tshianza tshia balume tshia Nzambi (tangila Efes. 1.19-23 ne Bien. 2. 24, 32; 3. 15,...). Kakuena mpata kabidi ne Nzambi wakitabuja mushinga - Kilisto wakabika bua dibingishibua dietu (Lom. 4. 25).
2.19 Tudi mua kusungidibua ku muoyo muakane wa Kilisto anyi?
To. Lufu lua Kilisto luakadi ne mushinga. Tshianana to, "lutete lua blé luakadi mua kushala nkayalu kaluyi ne mamuma (Yone 12, 24)."Kakuyi kumatshisha kua mashi panshi kakuena kubuikidibua"kua mibi (Eb. 9. 22). Bituikala tuakamanya mua kusungidibua ku muoyo muakane wa Kilisto (yeye wakakumbaja mikenji yonso); nunku mbuatshinyi Kilisto wakafua? "Bualu bua bikala buakane budi ku dienza dia Mikenji, Kilisto wakafua bua
patupu" (Gal. 2. 21).
Mu bualu ebu, tuangate mufundu wa Lomo 5. 10 "Bualu bua bituikala balengesha ne Nzambi, ku lufu lua Muana wandi, patuakadi bena lukuna nandi, nunku netutambe kusungidibua ku muoyo muoyo wandi patuakamana kulengesha nandi. Nvesa eu udi wamba bimpe patoke ne, netusungidibue ku muoyo, kadi udi wamba:
- bua bakadi bamane kulengejibua;
- bua kusungidibua ku malu makole mu njila wetu ke bua lupandu lua tshiendelele nansha;
- bua muoyo wa Mukelenge kunyima kua lufu, mu dibika, mu diulu, ke bua tshikondo tshia muoyo wende pa buloba kumpala kua lufu luende nansha.
2.20 Mbuatshinyi ntshilema tshinene bua kulongesha ne muena kuitabuja udi mua kujimija lupandu?
Bantu bakuabu badi balongesha ne, muena kuitabuja udi musungidibue, kadi padiye upanga lulamatu mu nsombelu wende udi mua kujimija lupandu elu. Kutangila mushidu eu, nkufikila kuamba ne, bua kusungidibua tudi bualu ne malu abi: kumpala kuitabuja mudimu wa Kilisto - lufu luende); ne kulonda, luendu lua "tshijila" anyi "lulamatu" lua muena kuitabuja. Buene kuamba mushindu mukuabu ne, lufu lua Kilisto pa mutshi mutshimakane nkayalu , kaluena lukumbana kusungila muntu tshiendelele. Nkupetula kua mudimu wa Kilisto ku mutshi mutshiamakane.
Luseke lukuabu, bikala lupandu luetu luakadi lukumbanyina lulamatu anyi luendu luetu lua tshijila, katuakadi mua kuikala ne "ditalala ne Nzambi", ne katuakadi mua kuikala ne bujadiki ne, katuena kabidi ne dipila kudiye - kutangila diyi dia Nzmbi didi ditupa bujadiki pa malu aa abidi (Lomo 5. 1 ne 8. 8. 1).
2.21 "Dilengeja" ntshinyi?
Kulengeja, "nkutuangaja" "kubueja diunvuanga ne". Bena lukuna babidi, badi ne bualu bua kulengajangana. Nzambi ku luende luseke, kakadi ne bualu bua kulengejana ne muntu (bualu bua kakadi muena lukuna ne muntu nansha, udi ne dinanga kudiye), kadi muntu, udi ne bualu bua kulengejangana ne Nzambi (2 Kol. 5. 20).
Dilengejibua kadiena mushindu umue ne dibuikidibua nansha (tang. 2. 7), kadi kadiela mua kukumbana kumpala kua dibuikidibua nansha.
2.22 Diyi dia Nzambi kadiena diamba ne bintu bionso ne bilengejibue anyi? Bikalabi nunku, bantu buonso kunshikidilu kabakusungidibua anyi?
Bintu bionso nebilengejibue ne Nzambi, kadi ke bantu buonso basungidibua nansha. Nvesa udi bualu ebu bupatukila udi wamba ne: "Bualu bua Tatu wakasanka bua tshiuwidi tshionso tshia Bunzambi tshikale munda muandi (mua Kilisto); ne bua kulengejijaye bintu bionso kudiye bua bualu buandi, yeye mumane kuvuija ditalala ku mashi a kumutshi wandi mutshiamakane ; bua bualu buandi kulengejijaye bintu bionso kudiye, ne bidi pa buloba ne
bidi mu diulu" (Kolos. 1. 19, 20).
Nvesa eu udi wakula patoke bua "bintu" ke bua bantu nansha. Buloba bujima buakamana kunyanguka ku bubi bua muntu (Lom. 8. 20). Bua bualu ebu, bintu bionso bidi ne bualu bua kupingajibua mu malanda ne mu diunvuangana ne Nzambi, ku bualu bua lufu lua Kilisto ku mutshi mutshiamakane: "wakavuija ditalala ku mashi a ku mutshi wandi mutshiamakane), bu mudi diyi diamba.
2.23 Kusungidibua kua buonso ntshinyi?
Ndilongesha dia dishima, didi diamba ne bantu buonso (balume ne bakaji) nebasungidibue kunshikidilu.
Mukanda wa Nzambi kawena ulongesha nunku nansha, nansha bikala nvesa mikuabu yakunvuibua bibi kudi bakuabu (tangila 2. 22). Bualu bukuabu, lungenyi lua kusungidibua kua buonso ludi lutupakana ne mifundu mikuabu ya mu Mukanda wa Nzambi, tshilejelu Yone 3. 36: "Udi witabuja Muana udi ne muoyo wa tshiendelele; udi upidia Muana kena wikala ne muoyo, kadi tshiji tshia Nzambi tshidi tshishala kudiye". Bikala tshiji tshia Nzambi
"tshishala" kudi bantu ba mushindu eu, mushindu kayi udibu mua kusungidibua "ku ndekelu"? Udi wamba "Udi witabuja" udi ne muayo wa tshiendelele" kabena bamba "buonso" tshianana" anyi "yonso" (Yone 3. 36).
